<p>جموں: جموں میں بھارتیہ جنتا پارٹی (بی جے پی) کے اراکین اسمبلی نے پیر کو عمر عبداللہ حکومت کی جانب سے گزشتہ دنوں مشتہر کیے گئے نائب تحصیلدار کی اسامیوں میں اردو کو لازمی قرار دیے جانے کے حکومتی فیصلے کے خلاف سول سیکرٹریٹ کے باہر احتجاج کیا۔</p><p>مظاہرین نے نیشنل کانفرنس حکومت پر الزام عائد کیا کہ یہ فیصلہ مخصوص طبقے کو فائدہ پہنچانے اور لسانی بنیاد پر تفریق پیدا کرنے کی ایک کوشش ہے۔ بی جے پی ایم ایل اے شام لال شرما نے اردو کو خوبصورت زبان قرار دیا لیکن اسے سرکاری ملازمت کے لیے لازمی قرار دینے کو صریح نا انصافی سے تعبیر کیا۔ بی جے پی نے مطالبہ کیا کہ اردو کو لازمی کے بجائے اختیاری زبان کے طور پر رکھا جائے تاکہ جموں کے باشندے، جو اکثر اردو زبان سے ناواقف ہیں، کو بھی فائدہ پہنچے۔ انہوں نے خبردار کیا کہ مطالبات نہ مانے جانے پر ریاست گیر احتجاج کیا جائے گا۔</p>
